POET: AKKITHAM(Akkitham Achuthan Namboothiri)
തോടുപൊട്ടിപ്പുലരൊളി-
ക്കുളിര്കോരുന്ന മാത്രയില്
കോഴിക്കുഞ്ഞു മിഴിക്കുന്ന
കണ്കളില്ക്കൂടി നോക്കി ഞാന്:
'എവിടെപ്പോയെന് മനസ്സില്
പണ്ടു ശബ്ദിച്ച പുല്ക്കുഴല്?
എവിടെപ്പോയ് കൃഷ്ണ, കാലില്
കിലുങ്ങിയ ചിലങ്കകള്?
എവിടെപ്പോയെന്റെ രക്ത-
നാഡിതോറുമുഴറ്റൊടെ
ഓളംവെട്ടിക്കൊണ്ടിരുന്ന
കളഭത്തിന്റെ സൌരഭം?
എവിടെപ്പോയെന്റെ നാവില്
നിദ്രാണനിമിഷത്തിലും
പ്രസരിച്ചുംകൊണ്ടിരുന്ന
പായസാമൃതനിര്വൃതി?'
ചവര് വീഴും മുമ്പെണീറ്റ
തള്ളപ്പൈക്കൊമ്പിലെ ത്വര
എഴുന്നേല്പ്പിച്ചിടും കാള-
ക്കിടാവിന് കൈകള് കൂപ്പി ഞാന്
വിമാനത്തിന്നിരമ്പം,
സാര്ത്ഥവാഹന്തന്നഹങ്കൃതി
യുഗങ്ങള്തന് മേഘമാര്ഗ-
ങ്ങളെപ്പിന്തള്ളി; ആരു ഞാന്?
No comments:
Post a Comment